"Was? Ihr
söttet doch in Japan si?! Wenn gönder wieder? Oder isch öpis passiert? "
Jä, mir sind zrugg in Basel & überglücklich. Aber jetzt mol vo vorne:
Die grossi Überraschig
Vom August 2015 bis im Dezember 2016 sind mit 17 Mönet durch Amerika greist. Nach 5 Mönet mit unserem Chevy Van in Nordamerika (Kanada & USA) sind mir mit em Rucksack 7 Mönet duch
Südamerika (Brasilie, Paraguay, Uruguay, Argentinie, Chile, Bolivie, Peru, Ecuador & Kolumbie) und 5 Mönet durch Mittelamerika greist (Panama, Costa Rica, Nicaragua, Honduras, Guatemala,
Belize, Mexiko und Kuba). Am Schluss sind mr nomol in d USA, aber das mol and Ostküste: Florida.
Drnoch isch es am 19. Dezember, nit wie offiziell
kommuniziert an Wiehnachte nach Japan, sondern nach *Trommelwirbel* ... Amsterdam gange!
Also vorallem d Nadja het sich unglaublich uf d
Heim-cho-Überraschig gfreut - was au so sini Tücke ka het, do gwüssi Fründ/inne ihgweit gsi sind und anderi nit und meh als ei Mol wär fast öpis usegrutscht bim
telefoniere!
D Idee isch scho im Frühlig do gsi und dr Björn het
sich denn au überrede loh, mit z spiele - obwohl sini grössti Sorg jo gsi isch, dass es z wenig Ässe wird ha, wenn mr eifach an Wiehnachte bi unserne Familiene an dr Huustüür lütte -
Danke Nils & Yasmin an dere Stell fürs dicht halte & mitmache!
Oslo - Norwegen
Am 20. Dezember sind mir während dr Zwüschelandig für 7
Stund in Oslo gsi, händ d Stadt agluegt, dr tüürsti Glüehwhy vo unserem Läbe trunke & dr besti Falafel-Dürüm gässe!
Amsterdam - Holland
Am Obe spoot simmer denn endlich in Amsterdam glandet. Dr Björn het sich scho gfrogt, wieso d Nadja so hibbelig isch: Anstatt wie erwartet händ uns indr Bierfabrik nit zwei Amsterdamer Fründe
erwartet, sonder 12 (!) vo unserne beste Fründe us dr Schwyyz! Sie sind extra für uns nach Amsterdam gfloge/gfahre, zum uns empfange & dr Björn z überrasche.
Es isch unglaublich gsi, danke euch allne! Es isch dr besti Empfang, wo me sich wünsche cha. Mr wärde die zwei Täg nie vergässe:
BASEL - SWITZERLAND
Nach 2 Täg in Amsterdam isch es denn am 22.
Dezember endlich sowit gsi: Mit Easy Jet simmer direkt uf Basel gfloge!
Die Flüg händ mr sit Endi Juli buecht ka - also denn, wo mr
verzellt hend, dass mr definitiv no nach Asie reise und erst ufe Frühling 2017 wärde zrugg si.
Mir händ die Asia-Story so oft verzellt und mit guete Gründ
untermuurt, dass mr sogar wirklich überlegt händ, no nach Asie z reise.
Und: Joo, me söll nit liege und ame händ mr uns au chli
schlächt gfühlt - aber d Überraschig isch es definitiv wärt gsi!
In Basel simmer vo wittere Fründinne überrascht worde, sind
no e Bierli go trinke und händ no e feini Rösti und e Unterschlupf bim Tobi & de Laura erhalte:
Vom Fritig Morge bis Dsistig Obe ischs denn witter gange mit de Überraschige: unseri Familie & Fründe sind überrascht worde.
Es isch e sehr emotionali und intensivi Wuche worde und e perfekti Rückkehr ind Schwyyz. Innerhalb vo einere Wuche simmer zrugg cho, händ um die 30 Lüt überrascht und sind überrascht worde, händ
unglaublich viel Kääs und Schoggi gässe, sind züglet und sogar ane Vorstelligsgspröch (unte meh)!
So toll s Reise au gsi isch, gits doch e paar Sache, wo mr vermisst händ oder uf die mir uns zumindest sehr freue:
• Uf unseri Fründe und Fründinne und natürlich uf
unseri Familie
Druf dr Jan, em Björn si Göttibueb, endlich
wieder z gseh. Und d Babys vo unserne Fründe endlich kenne z lerne: d Malea, e witters Göttichind vom Björn & dr Leonardo.
So toll die ganze Reisebekanntschafte au gsi
sind - es goht nüt über richtig tolls und tiefgründigs Gspröch mit Fründe/Fründinne, wo me scho lang kennt!
• Ufs Ässe
Obwohl mir viel selber kocht händ und guet
uswärts gässe händ, isch es doch e chli viel Riis mit Bohne gsi. Und au, dass e richtigs Brot mit ere Kruste in ganz Amerika so schwer z finde isch, isch und wird uns e Rätsel
bliebe.
Abgseh vom Brot freue mir uns uf Folgendes:
CHÄÄS: Mozerella, Feta, Greyerzer, Raclette, Fondue, Parmesan und und und.. Silserli, Gipfeli, Silsergipfeli, Härdöpfelbrot, Baslerläckerli, Fastewähie,
Gratins, Rösti mit Spiegelei, selber gmachti Pizza, Gutzeli und no vieles meh!
• Uf unseri eigeni Wohnig
Nach fast 8 gmeinsame Johr wirds au langsam Zyt.
Am meiste freue mr uns ufe Kuchi mit eme Backofe (Mangelwar in Süd-und Mittelamerika), Brotpfanne, wo e richtigi Beschichtig händ, Salz, wo nit eifach e füechte
Klumpe isch und vorallem e Schwumm, wo me cha benutze, ohne dass me Gänsehuut kriegt!
Ufe Balkon, damit mir chönne Gmües und
Chrüttli ahpflanze! Uf e Kleiderschrank mit e bitz meh Uswahmöglichkeitel (17 Mönet mit de gliiche 4 Hose, 7 Tshirts, 2 Kleidli und 2 Jäggli isch scho bitz
langwiilig) und vorallem: früsch gwäscheni und nit zerknittereti Kleider. Und trocheni Kleider! Uf unsers eigene Bett und Frottetüechli (ciao
Mikrofasertüechli). Kurz gseit: sich eifach wieder chönne richtig ihrichte und nüm useme Rucksack z läbe!
Es isch aber au e sehr beriicherendi Erfahrig gsi, so lang mit so "wenig" uszcho und s het uns zeigt, wie wenig Materiells mir eigentlich brucht und wie viel
"Unnützes" me eigentlich het. Mir händ uns fest vorgno, nüm in dä Kaufruusch ihne z cho und uns witterhin drei Mol z froge: Bruche mir das wirklich?
• Ufs Schaffe
Nach 17 Mönet Lotterläbe freut sich vorallem d
Nadja wieder ufe greglete Tagesablauf und endlich richtig ins Bruefsläbe chönne ihstiege (sie isch nach knapp 13 Stund uf schwyzer Bode mit em gsamte Gepäck ane Vorstellugsgspröch
& foht am 4. Januar ime Kindsgi als Stellvertretig afo schaffe:)
.... und was mr nit so wärde vermisse
Dass me
sich uf d Ussage vo de Ihheimische oft nit cha verloh, denn wenn sie öpis nit wüsse, säge sie glich eifach irgendöpis. So sind mir fast täglich mit Fehlinformatione konfrontiert gsi, was
ame wirkli müehsamgsi isch!
WC-Papier, oder
besser gseit, dass me s WC-Papier endlich wieder ins WC und nit in Mistkübel näbe dra cha schiesse! S wird wohl e bitz duure, bis mr uns das wieder abgwöhnt händ..
Dass me als Gringo mit übervollem Portemonnaie
agluegt wird & eifach grad mol s Dopplete vom übliche Priis verlangt wird. So wird me ganz schnäll abzockt, wenn me nit ufpasst. Mit e bitz Spanischkentniss chunnt me aber oft
drum ume.
Dass me oft grad 10 Mensche um eim ume het, wo eim
öpis wänd verkaufe/abiete: Toure, Taxifahrte, Collectivos (Minibus-Fahrte, wo s 5fache vonere normale Busfahrt koste), Usflüg, Ässe, z'Trinke, Elektronikartikel
etc.
wenn ich nämli gärn öpis hätt, denn chani eifach
in Lade oder an Schalter und kauf mir das!
Dass me ungstört cha Bus/Tram/Zug fahre und drbi
nit friert: do isch entweder e Film oder Musik gloffe - und das im einere Luutstärki & d Klimaalaag het für arktischi Temperature gsorgt!
Usserdem kenne d Busfahrer meistens nume Vollgas oder
Vollbräms.
Dass wieder Wärt uf d Umwelt glegt wird: dr Bus
lauft grudnsätzlich scho 20 Minute vor Abfahrt und binere Pause, wo weniger lang wie e halb Stund goht, wird dr Motor au laufe gloh. Usserdem wird oft dr Abfall eifach usem Fenster
gschmisse und am Strosserand hets chlini Müllhaldene..
Und Plastik isch immer und überall! Unglaublich.
Sehr schad.
Ich pack in mi Rucksack.... Nach öpe 9 Mönet
mit em Rucksack reise, händ mr s packe langsam satt ka. Au wenn mr so e System entwicklet - es beucht halt glich jedes Mol wieder fast e halb Stund.
Ufs Gäld: Dass mr wieder Schwyzer Franke händ,
überall problemlos chönne Geld abhebe und nit immer wieder mit neue Umrächnigskürs z kämpfe händ.
Wobii mir uns glaub au wieder an die saftige Priise
miend gwöhne.
D Nadja muess sich wieder agfwöhne, e Portmonnaie drbi
z ha - die letzte einehalb Johr isch dr Björn nämli Finanzchef gsi.
Highlights?
Was unsers Highlight gsi isch? Die Frog wärde mr nie chönne
beantworte - es het fast jede Tag es Highlight geh. D Länder sind so unterschiedlich & doch ähnlich gsi. Mir händ neui Kulture kenne glernt, hend d Vor- und Nochteil gseh & oft sind mir
zum Schluss cho, dass doch e Mittelwäg ganz guet wär. Nit schwarz und nit wiss, sondern grau.
Mir händ so vieli neui Ihdrück gsammlet, viel gseh, erläbt
und verarbeitet. Spannendi Mensche kenne glernt, tolli Gspröch gfüehrt. Uf die 17 Mönet wärde mir no unsers ganze Läbe lang zrugg luege & mir chönne sone Reis jedem nume wärmstens
empfehle. Mir händ zwar e Lucke in unserem Läbenslauf - aber sind um sooo vieli Erfahrige riicher.
An dere Stell möchte mir uns no bi allne bedanke, wo durch dä Blog an unserer Reis teil gno händ! Mir hoffe, ihr händ so e Ihnlick in die andere Kulture erhalte und s het euch gfalle!
Mir wünsche euch allne fürs 2017 nume s aller Besti, bliebet gsund und gniessed s Läbe! Mie freue uns, euch jetzt wieder öfters z gseh & au, die eint oder ander Reisebekanntschaft wieder z träffe!